Un paxaro pequeniño, o Troglodytes Troglodytes

Aquí tedes un carrizo. O Troglodytes Troglodytes.

É un paxaro pequeniño, de 9 a 10,5 cm.

Fai un niño moi xeitoso, eu vin moitos de pequena.

Está feito de herbas e musgo (ou carriza), con forma de esfera cun buraco para entrar.

Hai moitos (ou había) en Galiza. O seu chío é inconfundible!

Ao carrizo tamén se lle di carriza, tapullo na zona do Morrazo, carniza en San Martiño de Moaña e portiña no Rosal (seica ten que ver coa forma que ten a entrada do niño, coma unha portiña).

Outros nomes que atopei foron carniciña e carriciña.

Ademáis hai tamén as variedades carriso e carrisa.

Unha frase coa carriza: “Viulle o cu á carriza” no Irixo, Ourense.

Unhas cantiguiñas co carrizo:

O carrizo cando chove mete o rabo na silveira… así fai a boa moza cando non ten quen a queira

Teño un niño de carrizo na cabeza dun repolo, deron as nenas con el, levaron cañoto e todo…

Xente con xente, dicía o carrizo

Se queres apoiar ao Peto mira aquí.